城市電訊主席王維基精打細算，很會「攞着數」。香港逾半網民選用網上行，但網災後他夠膽第一個出來狂踩一哥電訊盈科「冇料到」，登廣告向電盈搶客之餘，還說下月起逆市加價，理由是香港寬頻在網災期間服務穩定。
山頂豪宅未鋪網
也難怪王維基牙擦，眼見網上行在網災後幾天連Yahoo也去不到，遭全港網民唾罵，怎能不心涼？王維基說，香港要聯網自救，並要政府牽頭，「萬一下次日本仔打到嚟，唔通仲靠業界？今次一早聯網，絕對救得番電盈，𠵱家出面以為香港復元得好慢。」
他最憎被人睇小，所以不肯向電盈租網，6年前拿10多億元自建固網，人家笑他儍，因為姓李的花了60億元。如今城市電訊固網覆蓋全港九成地區，最快明年做本地固網一哥；唯一「遺憾」是未覆蓋到他位於山頂馬己仙峽道的豪宅，最後還是要幫襯網上行，他回應說：「要昅住對手嘅服務質素，冇諗過搬屋。」
「出價100億即刻賣」
城電近年業績見紅，外界傳言他密謀賣盤，他聽罷收斂笑容稱：「我係實業家，唔止睇賺、蝕，股票都唔沾手，點可能賣盤？」但最終還是講出心底話，「有人出價100億，即刻賣，每個員工分幾百萬都好。」
上月初，王維基處女下海出戰選委會，以981票成為資訊科技界得票第三高，事後用毛筆寫了5,000多張「民主」寄給選民謝票，「感覺幾好，或者係時候企出嚟做啲嘢。」最值得高興的，或許是打贏960票的李澤楷。
本報記者