噚日國際代理行萊坊，拍賣觀塘海濱道181號地盤，雖然係商貿地，但現場人頭湧湧，多人到要企出門口，連會德豐地產董事黃光耀都一早到咗霸頭位，華華以為實有一番激鬥！點知當拍賣官宣布開賣價係3.2億元後，成個場靜晒，等咗3分鐘，先有揸住20號牌嘅四眼肥哥哥舉牌承第一口價。
四眼肥哥哥承價之後，成個場嘅人好似俾人點咗穴咁，拍賣官重複又重複問有冇人承價，間中只有一兩個電話響聲「回應」吓，情況都幾尷尬，擾攘咗成10分鐘，最後都係收番幅地，而在場人士即刻「解穴」雞咁腳走。
拍賣官速速散
講到明嚟睇吓嘢嘅黃光耀走得最快，記者追問佢點解唔舉手，佢就話：「咪有人舉咗囉！哈哈哈……」邊笑邊走。同一時間，拍賣官、賣方代表亦都全部走頭，又係嘅，勞師動眾只得一個人承價，仲有咩好講喎！
[email protected]