香港國際電影節即將舉行，今屆會首次加入競賽項目，舉辦亞洲電影大獎，電影節主席王志偉噚日喺中環嘅記者會宣布入圍名單，佢話：「今次舉行日期係3月20日，雖然同電影金像獎舉行時間（4月15日）好近，不過相信唔會有影響。」
張震角逐影帝
今次入圍電影係由17位國際級電影專業人士組成嘅評審團選出，當中有威尼斯同康城影展嘅總監，香港方面就有資深電影人吳思遠做代表。睇番入圍名單，有唔少香港人熟識嘅演員同影片，例如杜琪峯嘅《放．逐》，同埋內地導演賈樟柯嘅《三峽好人》，兩齣都入圍角逐最佳導演同最佳電影，呢兩套戲喺舊年嘅威尼斯電影節已經交過手，賈樟柯贏咗金獅獎，睇吓今次《放．逐》可唔可以反勝。而最佳男女演員嘅入圍名單就有張震、劉德華、Rain同埋鞏俐、章子怡、宮澤理惠等等。
對於獲兩項提名，杜琪峯噚日喺電話回應話：「今次嘅對手真係卧虎藏龍，好開心同多謝一班演員拍呢套戲時陪咗我九個月，𠵱家係時候借呢個機會開拓大陸以外嘅新市場。」
