呢幾日，孫柏文應承過大家會講點樣買實貨白銀，所以今日我就會同大家分享買嘅方法。大家都知道，孫柏文重複又重複咁叫大家買白銀嘅時候，一定要買實貨。
原本，孫柏文好想好想推介啲賣一磚磚白銀嘅地方。不過呢幾日來，實在有太多人怕將一磚磚白銀擺屋企床下底，所以為求可以唔需要攞一磚磚白銀就可以接實貨，我今日推介大家買白銀基金SilverETF。
因為呢個基金，可以好似股票一樣買賣，而大家每次向基金買一股，佢哋就要買十盎斯白銀。基金管理公司每年會從自動下調基金贖回價，去收取百分之一嘅管理費當倉租，既公平又易明。大家絕對可以考慮買呢個基金，基金嘅股票編號係「SLV」。
大家可能會問：「究竟用邊一個花旗國股票經紀好？」大家可以考慮用我用開嘅股票經紀E-trade（電話號碼：31913311）（利益披露：我冇收任何利益）。其實我用咗佢哋好多年都冇問題，所以大家不妨考慮用E-trade。最後，記得要長揸，最好每幾個或每個月儲夠錢就去買。
呢幾日，除咗諗白銀，都有諗和電（2332）賣印度業務單嘢，因為和電嘅董事會啱啱開完會，去研究呢單嘢嘅錯綜複雜關係同可出現嘅收購組合。其實，其中一個可出現嘅情況，就係和黃連和電也賣埋。不過我可以同大家講，和電印度拍檔Essar唔想再玩電信業，因為佢哋已經申請將旗下上咗市嘅石油、鋼鐵公司私有化。又好想將石油、鋼鐵業務發大，唯一可以得到呢兩個目的，就係售賣佢哋33%嘅和電印度業務股權。
仲有，呢單嘢可衍生嘅另一個後果，係其中一個買家Vodafone需要集資。好多話和電印度業務值200億美元，其實Vodafone手頭上嘅中移動941股票都值65億美元。佢哋絕對可以賣出該股份集資。不過，65億美元即係值500億港元，掟出來會否掟散個市？記得，500億港元唔係小嘢，分分鐘係一日股市成交量。
金手指網誌：
http://phatdat.blogspot.com