微軟（Microsoft）最新作業系統視窗Vista嘅企業版同Office2007軟件，舊年11月率先喺紐約推出，Vista家用版就今日（30日）先推出。微軟仲一擲千金，搵咗NBA球星做代言人拍電視廣告。
不過，好多業者估計，由Vista帶動嘅換機潮，最快要下半年先爆發。究竟有幾多人真係會嗱嗱聲將部電腦升級，從而爆換機潮，由《華爾街日報》網上版進行的調查，或者會得到一啲啓示。
據調查顯示，有份投票的3183人中，僅有一成人覺得微軟Vista會為市場帶來衝擊；43%認為呢套作業系統雖然成功，但冇乜特別；佔36%甚至對佢覺得有啲失望。
網友andriykharkovyy留言話：「試用咗Vista成個月，實在唔覺得有咩特別，基本功能同XP都係大同小異。雖然Vista都有佢嘅特色，但又不足以要用戶揼錢換機或者升級囉！」
joseroig認為，除非屋企部電腦壞咗，如果唔係都唔會無端端畀錢同部電腦升級，佢話：「橫掂唔少電腦都會預先安裝Vista啦，索性等𠵱家部電腦壞咗，先買部新機咪有得用Vista囉，使乜花錢upgrade。」
無端端 無謂換
longtaddy亦認同：「電腦同軟件都係用嚟輔助我哋嘅日常工作啫，唔使趕潮流，試諗諗如果每隔2、3年就要換個雪櫃，應該都幾煩。」
據《InformationWeek》網站報道，網上零售商開出嘅OEM版WindowsVista作業系統售價，與WindowsXP價格相近；換言之，新版作業系統應該唔會令電腦售價大幅提高。