繼舊年12月幫機場成個客運大樓鋪Wi-Fi網絡兼整六部電腦畀人免費上網後，8號仔再下一城，話要將香港發展成Wi-Fi城市。
8號仔個人客戶業務董事總經理陳紀新噚日宣布個Wi-Fi拓展計劃，包括將無線上網「熱點」數目，由400個加到3000個（當中包括地鐵港島沿線同埋九龍部份車站）、將Wi-Fi服務範圍，擴展到領匯啲公屋商場舖，畀市民免費瀏覽政府網頁推動e-政府概念，最正係佢哋會同香港各大專院校合作，推廣數碼學習環境，畀12萬名大專學生免費用呢個服務……唔知N年前畢業嘅舊生，有冇呢個優惠呢？
咁點解大搞Wi-Fi？陳sir講話，舊年佢哋Wi-Fi服務使用量增長超過一倍，網上行近80萬用戶中，有10%用緊。簡單啲講，商機無限囉！
[email protected]