混血名模AmandaStrang、葉佩雯、DJ阮小儀及ILoveYouBoyz等，前晚在銅鑼灣出席Chocolate時裝店開幕禮，眾女星帶同愛犬出席兼打腳印，Amanda的爹利狗Emma的骰嬌小，十分搶鏡，小儀的愛犬DeeDee則表演雙腳企，場面非常熱鬧。
Amanda透露童年時與狗無緣，她說：「我細個爹哋養咗一隻法國冠軍都柏文狗，我一出世佢就唔鍾意我，可能呷我醋啦。」她謂現時養了一大一小狗，她說：「Emma得八、九個月大，又細粒，不過佢會蝦屋企另一隻大狗，仲會搶佢嘅玩具。」
養狗變溫純
至於葉佩雯的三歲白狗Toro也十分趣致，葉佩雯說：「佢其實受過好多苦，因為佢天生盆骨有問題，曾經做過大手術，當時我好似做人媽咪餵奶咁，晚晚幾個鐘頭就要起身一次照顧佢，不過養咗Toro之後，我性情都改善咗，少咗發脾氣，比以前平和。」
此外，小儀與緋聞男友Donald同場，兩人抱狗合照時更被笑為「一家三口」家庭照，小儀說：「佢唔養狗，只養貓，因為佢自己係男人老狗。」
採訪、攝影：吳天慧
