李超人同佢間和記黃埔（013），最近新聞多多，繼大陸爛尾樓之後，又有油魚跟住嚟。不過，網民股民似乎唔太同情誠哥，5個k喺《香港討論區》留言就有啲匪夷所思，佢好激動咁話曾經同李超人食飯，仲似層層咁「引述」超人講話，「佢話星期一（前天）個市會升300點，同佢睇好中國銀行（3988）！」
食油魚 一齊瀉
聽見5個k咁講，討論區馬上熱鬧起嚟，但最多人回應嘅唔係股市同中國銀行，反而係鬧到滿城風雨嘅油魚事件。
qoo108質疑：「嘩，風頭火勢，仲去食油魚？」
~BAN~47笑佢：「請你食全油魚宴。」LessIsMore2更抵死咁話：「食完小心屙拔甩。」Superstoreman則語帶雙關話：「請佢食油魚扒，即係話一齊『大瀉』。」
不過，部份網友始終唔肯放過超人，先有petpet7204話：「為咗證明無問題，就叫佢食（油魚）啦。」
傳「聖諭」 撐中行
相比油魚回應，只得少數網友真正提及中國銀行，例如Maytin話：「我信佢，據聞李生都有唔少3988，4蚊配股，冇理由畀佢破。」
事實上，較早前市場有傳，中行有股東以每股4元，配售3.5億股；加上大陸近日醞釀加息，市場對中資股唔多睇好。噚日中行收3.9元，無升跌，股價似乎仍然唔見起色；另一間大行摩根士丹利就仍然睇好，最新目標價為4.22元，有8.2%上升空間。
前天，恒指收報20236，跌咗44點，似乎同「超人」嘅預言背道而馳喎。