眨眨眼，MH區文浩就坐咗電訊管理局局長個位幾年，今年7月夠鐘退休，噚日OFTA嘅年終記者會，分分鐘係佢最後一年做主持，咁𠵱家官府搞緊兩局（電管局同廣管局）合併，邊個做話事人仍然言之過早，MH到底如期退休抑或搞埋過渡先拜拜，一直受業界關注，事關佢哋覺得轉莊會對電訊政策有唔同程度影響，咁當事人點講呢？
MH當然唔會咁快開估啦，佢仲話自己退休唔係一個重要課題；再者，所有嘢係成個局一齊做，而唔係佢一個人……同意！查實MH上面係工商局平叔，平叔上面有曾仔，曾仔上面係阿爺，邊個話事大家心中有數，某程度上，MH只係響前線負責「招呼」同埋「睇住」班郁吓就告政府嘅電訊商，都咪話唔辛苦！咁唔講退休，佢又點睇𠵱家電訊業生態環境？OFTA又係咪好似外間所講，成日受到電訊商施壓呢？
MH話，壓力越嚟越大係一個trend，因為競爭越嚟越大，個個電訊商都要努力保護自身利益，所以，官司係會越來越多，而呢個就係市場成熟嘅現象，佢仲話當規管當局同operator有偈傾易商量嘅時候，就係市場有壟斷之時……唔怪之得，李家二少檔8號仔咁鍾意JR（司法覆核）OFTA啲決定啦！
「有腰骨」就有代價
不過，華華最最最欣賞係MH同班同事，不怕強權，成個局夾埋得六件法律顧問，最渣嘅電訊商都多過佢，JR王8號仔更加唔使講！好話唔好聽，如果二少要開拍X號皇庭或者律X先鋒，真係長拍長有兼唔會重複主角！
雖然OFTA係弱者，但次次都抗衡到底，之但係「有腰骨」就有代價，MH他日退休，睇怕都唔使旨意好似一哥去幫有錢佬做「實Q阿頭」，更加唔使旨意好似佢上代阿頭艾維朗咁，入8號仔撈番一官半職囉！
[email protected]