馬來西亞資金嘅萬信金融，因應母公司喺大馬攞到商人銀行牌照，可以兼營投資銀行生意，將會統一採用「僑豐金融」呢個新中文名，英文名維持OSK。僑豐董事總經理許照中噚日同華華食晏時話，維持OSK呢個英文名，因為個名用咗好耐，繼續用可以慳番啲口水，方便推廣。
佢又披露𠵱家傾緊買一間有6至10個人嘅本地中小型投資銀行，預計拎1000至2000萬元嚟買。佢感歎道，香港成日話自己係國際金融中心，但要搵一間具規模嘅本地投資銀行都冇，所以好希望可以做好呢瓣生意。
佢忍唔住爆埋，OSK一年前已經諗住拎1.4億元出嚟，買一間喺本地有6間分行嘅證券行，點知對方縮沙。佢講呢單舊聞出嚟，主要想話畀人知，OSK真係有心買嘢。
[email protected]