舊年下半年個市氣氛咁好，造就唔少街坊股神，咁係咪無人坐艇呢？未必！有人喺《香港討論區》度搞咗個「2006年最強蟹貨新股王」選舉，列咗廿幾隻「精品」畀大家揀，當中「極品」應該係股價完全無「陽光」嘅陽光房託（435）；另一隻地產基金冠君產業（2778）亦唔弱，成為眾望所歸嘅「冠軍」！
陽光冠君高票當選
先講冠君，小喵ki話：「正垃圾，好彩一開市蝕都放咗，唔係蟹到𠵱家。」tsubasa23呻：「未升穿過招股價……抽到都喊三聲……搵笨！」qiuwood就話：「100%AGREE！等極都返唔到家鄉。」ay3288就講：「包銷嘅大摩同美林都做咗蟹！」咁陽光呢？多人揀但無人評價，似乎盡在不言中！
其他極品仲有creamo提供嘅「民安控股（1389）！垃圾之中的極品！」btbillyon提名「707協盛協豐，潛到無影！」jonnyC：「中交建（1800）強勢當選！」ekklee：「金界控股（3918）非佢莫屬。」
五大跌股竟然唔入圍
之不過，根據蘋果自己做嘅統計，舊年全年埋單，五大跌幅新股其實係先進半導體（3355）、合俊（2700）、浙江世寶（8331）、吉林奇峰（549）同埋凹凸科技（457）；兩隻房託都入唔到五大，唔通揸咗呢5隻股嘅蟹民已經心死，連講都唔想。
講番啲開心嘢，5隻舊年最賺錢嘅新股，分別係玖龍紙業（2689）、湖南有色（2626）、世茂房產（813）、靈寶黃金（3330）同埋金鷹（3308）。呢個統計淨係計到年尾，如果揸到𠵱家，應該要執過個位嘞！