今年新一浪新股，3隻股嘅招股反應都唔錯，財爺家族嘅美維控股（3313）反應好，超購有過百倍都唔出奇，但係連招股價一啲都唔平嘅武夷藥業（1889）都過百倍，就有少少出奇，亦都證明咗市場資金仍然相當充裕。散戶舊年逢新股必抽，執錢無乜難度，𠵱家見有新股抽，好自然都想賺番些少過年。
理論上有番咁高倍數超購，應該唔會咁易跌破底價，事實上除咗幾隻REITs之外，近幾個月新股好少即日就穿底，如果有超購都首日穿底，咁就要記低係邊間行保薦，認住佢個嘜頭。仲招緊股嘅阜豐（546）由金榜同埋荷銀洛希爾保薦，預測PE在12.3至16倍之間，估計會係反應比較好嘅新股之一。
阜豐係做乜嘅呢？據招股書載，主要係生產味精、黃原膠、澱粉甜味劑、谷氨酸和肥料，獲不同行業採用，包括食品、保健、農業、製藥以及石油勘探等行業。谷氨酸用作味精生產，而阜豐則是全國最大谷氨酸供應商，產品價格受味精及玉米顆粒供求與價格波動影響。
此外，阜豐為全國第2大的黃原膠生產商，黃原膠可作為食品添加劑或流變修飾劑的聚糖，由於黃原膠具有增稠性高及黏性等特性，可以用於食品行業如溶膠，用於石油開採行業，則可以提升石油鑽探之回收率。
首選中國香精
中國香精（3318）、味丹（2317）係阜豐嘅影子股，但睇味丹近日走勢，唔係首選，反而中國香精圖表較有睇頭，或可一炒。亦有人話大成生化（809）係影子股，兩者都以玉米做主要原材料，不過由於近年興環保的乙醇汽油，玉米呢種乙醇原材料被炒高晒，大成同阜豐都係受害者，而且睇過大成個圖，無乜興趣買貨。
歐陽風