地產部落:買樓唔換鎖點得心安

地產部落:買樓唔換鎖點得心安

樓市交投好咗,多咗人換樓或者上車,網上有關地產嘅話題亦變得多元化。好似《review33》上面,早排就有個好實際又幾得意嘅話題──fleetline問:「有冇人買咗樓入伙後唔換鎖?老婆話不如唔好換鎖,只換鐵閘,因為上手把鎖幾靚,要換就好貴,不如只換鐵閘。但係我又唔係幾放心,各位有冇類似經驗?」
Hi_Hi話:「層樓幾百萬都畀咗啦……」窒到出晒面嘅兩炮話:「唔爭在啦吓嘩,出面大把鎖仲靚啦!」亦有客氣啲嘅EddieWan話:「心安幾時都緊要過靚。」
實際提議亦有唔少,好似redwhiteblue、大頭b仔、kome異口同聲咁講:「換鎖膽咪得囉!」

換鎖膽 最簡單

似乎明白晒嘅fleetline反問:「可唔可以叫人上嚟只係換鎖膽?雖然我知道可以自己換,但未試過,影幾張相,然後去舖頭俾佢睇就可以配?」不恥下問嘅學習態度,得到更多網友「教路」,redwhiteblue提醒話:「最好度埋鎖膽同度門嘅厚度,影埋門框個窿。」wajah仲直接,「拆個鎖膽去配咪得囉!」
有啲網友就認為求人不如求己,Diotong話:「鎖膽好易換啫,自己試吓拆,識拆就識換㗎啦。」更現實嘅lun話:「換鎖膽,扭幾扭,幾分鐘搞掂,自己搞吓啦,你叫人嚟換,見佢三兩下換好就收錢,你會覺得好笨㗎!」
突然諗起好多年前成日叫人用哥士的嘅曾近榮曾sir,其實日常家居好多嘢都可以自行修理,大門鎖個鎖膽的而且確好易換,去賣鎖嘅舖頭,配個同型號嘅鎖膽,返去扭鬆幾口螺絲,就可以成個鎖膽抽出嚟,換咗之後上番啲螺絲,咁就搞掂,快過煮即食碗麵。即使成把鎖換,其實都唔係好貴,市面上由幾百蚊到幾千銀一套鎖都有,當然,成把鎖換就搵師傅好啲,因為可能牽涉到門身同門邊開窿,裝鎖亦要講技巧同手工。
雖然話換鎖係求安心,但黑仔起上嚟咩嘢鎖都幫唔到你,好似@喜力B話:「木門其實好兒戲,試過有朋友屋企俾人爆格,已經係實心木門加大鎖頭,但係一睇就知人哋係用鐵筆夾硬撬爆度門,所以基本上用咩鎖,對啲賊嚟講都唔成問題。」