配合市場需求，市面上嘅投資講座亦愈開愈多，高盛噚日搞嘅「07認股證及港股高峰論壇」，出席人數有近4000人，坐滿會展新翼五樓大禮堂，仲加開百多張櫈招待向隅嘅市民。
輪后高盛亞洲證券化衍生產品主管李頌慈最開心，因為今次由佢做主打，佢噚日悉心打扮，艷光四射，開壇教大家炒輪。
佢話玩輪有四部曲：首先要選好心水股或指數；然後定出時間，如果估三日會升，就買短期兩三個月嘅輪，如果估1個月至升，就買啲四五個月較長期嘅輪；跟住就睇輪嘅條款，係價外價內、到期日、引伸波幅同行使價等；最後就要留意市場環境走勢。
佢話炒輪其實同打牌差唔多，先決定打廣東牌、台灣牌，然後睇打幾多圈，仲有要決定食大糊定細糊，最後就留意對家打乜牌。
佢又話，𠵱家啲輪引伸波幅好大，搞到發行商成本高咗，輪商如果趕唔切將成本反映喺輪價上，好易一頸血！
[email protected]