車路士大病初愈，聯賽盃、足總盃先後有次級球隊幫手練兵，連贏兩場，各射手重拾射門鞋，不過，今周聯賽對住布力般，贏波並非易事！
我覺得英格蘭足總嘅賽程可以話係幫咗車仔！車仔由艾辛客串中堅，防守角色還須磨合期，好彩有聯賽盃同足總盃嘅出現，對手唔係好強，可以當練波咁練，重新試下反守為攻，試咗兩場，聽晚就要試堅嘢啦！車路士雖然冇艾殊利高爾同泰利，其實，謝列美同布歷治，我覺得佢哋都係一級嘅防守球員，加上後者嘅助攻能力不下於艾殊利高爾，後防已入佳境，我絕對放心。仲有，連舒夫真高都識入波，夠晒信心啦！
但係，對面布力般都唔係弱隊！上場聯賽，布力般竟然輸俾屈福特，我覺得有啲古怪！聽晚，我相信麥卡菲，摩頓柏達臣依然係擔正，車仔後防好有機會會失波！當然，布力般作客想贏就真係好難，睇吓「讓球主客和」有冇能力和波啦！
周鵬
商業1台《球迷集中贏》主持
電郵：[email protected]