舒夫真高近兩場波入3球，雖則話都係盃賽對住啲低組別球隊，但難得踢足全場，入波後又同啱啱鬧佢「自私精」嘅杜奧巴好似好friend咁，都算係佢加盟車路士以嚟最風光時刻。而佢喺比賽期間被人踢跌時，領隊摩連奴喺場邊笑（摩帥解釋，佢笑係因為估中「軍刀」遲早被踢低），唔理咩原因，佢總算博到領隊一笑，算係一大突破。