雖然要預約，過關前又要遭入境處職員眼超超，內地孕婦照樣湧港，booking爆燈，入院潮早臨（順便岔開一筆，風水專家有分歧，內地高人指出，立春後那個並非金豬年也不是火豬而是土豬，嚇到內地不少阿媽提前入院剖腹，唔要丁亥，寧狗勿土！）聽講已經爆到去五月。計一計數，每個孕婦消費套餐價埋單點都要三、四萬，這筆收入，幫補醫院唔少，是一筆可觀的進賬。醫院稍有頭腦，肯定會食住這樣百年不遇的商機，擴充婦產部門，拉攏實力準阿媽，提供一條龍坐月陪月服務，在醫院附近租住服務式住家，請埋經驗陪月阿姐服侍，還有收身教練傍住指導，學足台灣星級私院。這樣的服務，只有私院能夠變通做到，公立醫院難執生，收費唔算平，內地孕婦除非立心走數賴賬，否則貨比貨人比人，自然到私家醫院check-in。口碑潮流成形，私家醫院收入水漲船高，隨時掛牌上市，分埋股票市場的一杯羮，政府醫院只有做蜑家雞。
香港人被內地貨整蠱得多，毒蛋禍港和孔雀石綠蒲頭以至禽流感洗牌變種，全部屬於三級驚嚇。但不是每樣內地出品都是劣貨，內地產婦過港生仔，帶旺婦產和兒科，是旺丁又旺財的健康人流。賴賬、棄兒和密謀綜援的只屬少數（香港失職父母才是主流），政府毋須誇大其事，分化中港大肚婆。