所謂「上有好者,下必有甚焉」,由特首曾蔭權掀起的風水陣潮流,已由禮賓府席捲打工仔辦公室!話說有辦公室新仔初上班,首要工作並非請同事大吃一餐打好關係,而是在辦公桌範圍擺好一副風水陣招財,同事擔心遭風水陣「邪住」,擬擺八卦力抗,一場「辦公室風水戰」一觸即發!
「話說有條新仔,佢個位係喺我個位正對面,條友仔喺個位擺風水陣,真係俾佢激死!」據網民ac520透露,新仔同事部署的「戰略性風水武器」包括六吋長的風鈴及一個吊鐘,前者更掛在通道出入口,令他感到莫大「威脅」。「佢話用意係招財喎,不過未有財前,就俾其他同事笑咗好鬼耐。」
同事求救擺陣反擊
新仔的回應十足十中國對外強調發展軍備不會危害鄰國,但作為「鄰國」的ac520當然不敢掉以輕心,即時上網向網友求救,甚至計劃作出反擊。「對風水有認識嘅網友們,條友用意究竟係咩呢?我使唔使去google搵番個八卦番嚟,print張紙對住佢呀?」
網友回應眾說紛紜,有人建議擺水晶陣,有人建議掛裸女圖,不過,專業風水師麥玲玲則建議ac520一於少理。「兩樣嘢都唔係用嚟招財喎,風鈴同吊鐘都係用嚟化病星,可能嗰位同事覺得自己好多病啩。」
「打工仔喺辦公室唔好望招財嘞,想去廉署飲咖啡咩?諗吓升職好過喇!」細心的麥玲玲師傅提醒打工仔,今年文昌位在西方,大家在辦公桌西位,擺放水種的富貴竹即可。