一月二十五號本欄寫街頭吸煙，裏面提咗一句：特首好易做，點知即時惹來幾位讀者大罵，話左丁山shortshort哋，又話左丁山係乜乜乜。乜反應咁大呀？香港原來有人生性保皇，講吓反話都唔得嘅。一位仁兄話：「唔通叫姓董嘅做番咩。」呢個係唔錯嘅提議，只要董生學精啲，無為而治就得嘞。治理香港最緊要學漢文帝、漢景帝，唔好學做「大有為特首」，搞甚麼最低工資、公平競爭法以及發出甚麼十一五行動綱領。叫班商家佬坐埋一齊，震盪大腦，結果必然係列出一張洗衣清單，樣樣要，希望阿爺畀齊，即使問十樣，阿爺畀一樣，都有賺冇蝕㗎！如果你信政府會逐項建議推動，咁就太過天真咯。
又有讀者來電郵話年近歲晚，要求左丁山提供一啲風水算命師，恕難從命，一來唔想鼓吹，二來公開推薦，恐怕為自己惹上麻煩。至於有讀者問幾時團年等等，梁玳寧已在《經濟日報》寫咗五日，請查閱番。簡單啲講，梁玳寧引述傅會長之言，點出團年飯宜選二月十一日星期日下午五至十一時，次選二月十七日午時（十一時至一時）。開年飯宜選年初三（二月二十日）午時，勿選年初二破日。開工吉日最好年初四辰時（七時至九時，傅會長話香港時間比標準時宜相差二十四分鐘，辰時由上午七時三十分開始更穩陣），次選係年初九午時。
丙戌年將過，到咗立春之日（二月四日下午一時十八分），就係丁亥年豬年。丁亥年犯太歲者包括虎猴蛇豬。因為亥刑亥（亥屬豬），申（猴）亥相害，巳（蛇）亥相沖，至於為何寅（虎）犯太歲，左丁山唔識。據傅會長講，四個犯太歲生肖之中，以肖豬者較為辛苦。犯太歲者宜貼身佩上一個有羊的銀牌。
新年日子講完，要多謝梁玳寧每年搵傅會長指點。既然天主教徒都搵高人睇風水咯，我哋信番些少唔係過份，信太多就另計。呢晚食飯之時，碰到一位昔日盤房（dealingroom）高手，講起一位絕頂聰明嘅經紀在八七年沒頂，不勝唏噓。高手話：「聰明人聽咗×伯講，話一定大發特發，咁就極度進取，碰上股災，瓜晒！」