美國樓市雖然正在調整，但仍有部份人不滿樓價偏高，猛呻買樓艱難。Avidreader喺《MSN討論區》話，聽講美國唔少職位（如樓宇管理員、教師等）薪金偏低，想做業主，恐怕要等第二世。
ABmyhun講，喺美國密西西比州，教師起薪點大約每年3萬美元（約23.4萬港元），但新樓嘅售價最少都過16萬美元，如果唔做兼職，多數人都買唔起樓。或者有人會話，年薪3萬美元嘅教師其實有能力置業，不過唔好忘記，買樓之後已冇乜錢剩，將來可能唔夠錢退休。
年薪23萬都供唔掂
newname81話：「我喺紐約市從事金融業，年薪有成8.5萬美元，但依然冇能力喺當地置業。」yomoney講，美國部份銀行嘅樓宇按揭收費太高，令當地人買唔起樓，啲業主被迫要劈價求售，照咁睇，美國樓價可能仲未跌完。
不過，Wastingthyme1就認為買樓唔係咁難，因為如果年薪有3萬美元，大約5年後就會升到4萬美元，應該可以畀首期，然後去銀行做10萬至12萬美元嘅樓宇按揭。佢仲話好少人一畢業就榮升業主。
隨着樓市繼續降溫，美國到處都有好多「業主灑淚大賤賣」嘅賣樓廣告。根據《經濟學人》報道，舊年美國二手樓銷量大幅減少11.5%，新屋銷量下降25%，令貨尾樓盤激增50%。瑞士銀行認為，美國今年地產市道仍不景氣，樓價會繼續下跌。