實不相瞞，直至現時為止，我對TIIDASporthatch的觀感還是好壞參半；不滿意的是它那過份低調的外表，車頭造型唔突出，線條簡單似房車，毫無跑味純到痹！同周街都係嘅日本揭背車無分別。但學阿媽話齋，好多嘢唔可以單憑外表判斷，我相信睇車都一樣，所以決定畀個機會佢同自己，向代理借來一架TIIDA作4日3夜深入了解，結果是出乎意料之外，想不到在毫無殺傷力、純良的外表下，隱藏着一份原始獸性，感覺就似是一隻披着羊皮的狼！
記者：黃婉冰
攝影：林栢鈞
Model：Geneieve
外表單純內裏狂野
最始料不及的是，想不到一架1,500c.c.的日本揭背車仔，居然可帶給我一種爽快、直接的感覺！雖非推晒背、起步「呼」一聲就去到街尾嗰種速度，但由起步到加速，卻超越一架日本車仔的局限。HR15DE引擎、109匹馬力加上15.1kgm扭力，無疑是最大而又「看不到」的賣點。每次起步，毋須大大啖地台油就已經爽快地起跑，中尾段感覺同樣超爽，遇上大直路唔覺意快放，咪錶指針不知不覺間就飆升到100km/h！即使上斜，一樣要加速有加速，燈位前搶閘Cut線、讓線前停車再起步，每一個動作都無令我失望，加上短小外形，在鬧市橫街中穿插可謂毫無難度。
矮身短尾入彎穩快
TIIDAHatchback不夠型格，這點在我心中是不變事實，但另一方面，我又發掘到其他好處，就是短小易操控、車身重心夠低，加上底盤紮實、軟硬適中的懸掛，令我全程悠然自得在擠迫的街道上穿插，就算遇上急彎，亦可從容不迫地單手入彎！泊位就更加毋須擔心，因為無尾，所以新手泊位都無咁易撞甩車尾。
編輯有話兒
可能我份人較老套，所以並唔覺TIIDA樣笨，當然亦唔算辣啦！圍着將軍澳工業邨試揸兩圈，的確有驚喜；燈位低波起步，乘着高轉推回D波，0-100km/h瞬間完成！最後圍着細小迴旋處猛轉讓攝記影相，靈活無波Out，無尾車掟彎真係唔同啲。最緊要1,500c.c.級別啱晒港人愛實際嘅口味！
特大車櫳全靠偷位
車仔要做到實用率高，最緊要識得偷，否則點做到車細容量大？TIIDASporthatch在這方面可以稱得上是表表者，如果唔係偷位功夫一流，又點可以在空間有限的車廂內配備晒4個杯架、複式儲物櫃、碎銀兜，還能有一個高容量尾箱？特別是車廂，無論在高度和闊度上都做到寬敞效果，就連高大威猛的男編輯和長腿Model坐在後座和前座都毫無壓迫感，坐滿5個人，看似細小的尾箱同時放入手拉篋1個、大袋2個依然綽綽有餘，將後排座椅拉低，整個尾箱更見實用，唯一美中不足是司機位與軚盤的距離頗近，如果有大肚腩一定會造成上落不便，好彩記者還未肥到要頂住肚腩揸車呢個可悲地步！
話你知：FullGear上陣變警車
除5門揭背外，TIIDA另有一款4門房車，而家陣警隊有款警車就係呢個型號，當然，警車會有少許唔同，好似車頭、車頂會裝有警車燈、警號、擴音器等，車廂亦會有對講機、電池，為安全起見，車身玻璃同車燈位置都會加裝保護隔網，除此之外，警車會抽起「無匙系統」、自動感光頭燈、皮座、合金胎軨同恒溫冷氣等配備，齋到痹。
NISSANTIIDAHatchbackSpec：
引擎：1,498c.c.直4CVTC
馬力：109ps/6,000rpm
扭力：15.1kgm/4,400rpm
傳動：4前速自動波箱
車價：$124,800
車輛提供：合誠汽車（28035333）
