一位老友記在鬧市開咖喱屋，唔再做會計師，幾年前左丁山見到佢，問佢為何如此，佢話：「大隱於市」，講得氣定神閒。「大隱於市」係禪宗之言，原文似係「大隱隱於市，小隱隱於山。」諗真啲，退隱山林，不再與塵世交往，以為好清高，原來層次仲未夠高，只係小隱啫。能夠於鬧市居住，生活於吵鬧喧嘩環境之中，仍然心有所執，身有所繫，不為塵世煩擾嘅，先至係最高層次嘅歸隱。
另一位會計師退休後復出不夠一年，再度退休，專心做教會義工，行蹤如神龍見首不見尾，呢日突然打電話嚟傾幾句，左丁山讚佢「大隱隱於市」，會計師話：「冇咁高級，只係不再捲入中環商事與人事政治啫。」左丁山順便同佢講另一位老友喺中環開咖喱屋之事，叫會計師不妨有空去試吓啲curryflavour。點知會計師反應甚快，答一句：「喺中環要成功，唔係講curryflavour，係要講curryfavour。」
左丁山為之失笑，會計師亦於笑聲中講拜拜。喺公司，人事政治之中，唔向上司、大老闆、權貴人物curryfavour，你估得唔得呢？如果話唔得，老實人着實感到氣餒。後來打電話畀律師W講公事，順帶提及老實人會否成功。律師W素來對老友不打誑語，一句就到肉：「咁多年來，我見過唔少法律文件與商業談判、收購，可以話畀你聽，多數係奸人發達，老實人乞食嘅。」聽完為之洩氣，諗諗吓，開咖喱食店嘅老友可能喺中環大公司之中唔識curryfavour，先至覺得不如退休去搞curryflavour。
塵世如此，不如睇番一啲激勵人生鬥志嘅演講詞，聽退休大教授之言，搵啲邱吉爾言論讀吓，振奮精神。點知睇到一句，笑到碌地。一位LadyAstor與邱吉爾因意見不同，激辯一番，最後對邱吉爾講：「Winston,ifIwereyourwifeI'dputpoisoninyourcoffee.」邱吉爾即刻答：「Nancy,ifIwereyourhusbandI'ddrinkit.」相信激氣到暈嘅就係呢位女士。