喺街機界穩佔舊年最Hit嗰幾隻之一嘅《三國志大戰》，由宣布移植落NDS嗰刻已經成為全民焦點，即使冇人親身試過，齋睇幾張畫面相已批定佢掂過碌蔗，一出必買咁話。鑑於代理返唔到行貨，搞到貨源喺香港極為緊張，收到風嘅機迷一知有得賣就將Game舖重重包圍，炒到五百幾六百蚊依然面不改容，堪稱近排少有盛況！
文：陳福榮
之前聽有去舊年TGS嘅行家講，《三國志大戰DS》試玩反應極之普通唔使點排隊，好多方面NDS都比唔上街機咁優秀，但話晒佢都係暫時唯一玩到嘅家用及手提平台，純粹用原版嚟比較似乎有欠公允，不如拎佢移植後嘅表現、以至新增要素比較吓。基本上呢隻手提版都算用盡NDS嘅性能，有3D之餘更玩盡成個TouchScreen，而且聰明地打直部機Fit番街機比例，惟獨無法做到多點式感應，必須借助預早串連嘅技巧，雖然係咁只要掌握箇中要訣，玩起嚟都算差唔多Feel。
街機NDS對照
原本街機版嘅上下配置，上芒睇戰場畫面，下面放晒人物卡，嚟到NDS就變成左右對照，所以要打直部NDS來玩，變成左面睇Game，右面篤卡，廠方亦有貼心設計，對慣用左手玩家，亦可以於設定內選擇畫面方向。
醒神靚卡似足街機
為咗令手提機版有較高原創性，世嘉除咗喺隻Game入面收錄逾三百張歷代《三國志大戰》嘅遊戲卡之外，仲專誠整多幾張連街機都冇嘅原創卡，加上隨Game附送一張可以拎出街用嘅EX凌統，實行做到手提街機互相連動嘅效果。而為咗令唔多玩街機嘅朋友，都能夠享受到有卡喺手嗰種實在感，唔單只可以仔細觀賞設計同街機近乎一樣嘅卡片，每玩完一局更會送多張卡畀你，將卡由錫紙包推出嚟個畫面真係似足「潛卡」，無論閣下有冇玩開街機都會帶來更大嘅投入感。講番基本系統，由於每張卡都有唔同Cost，玩家要喺上限為8分嘅條件內編排五張卡，能力越高代價固然越大，好似關羽呢位猛將就要成2.5分，因此點揀呢五張卡真係極有學問。
為咗突顯同街機版嘅唔同，世嘉專誠搵幾位插畫師幫NDS版整多幾張靚卡。
一筆串連控兵有計
跟之前又係世嘉嘅足球卡機《WCCF》相同，《三國志大戰》係容許玩家喺同一時間控制多個部隊，但NDS基本規格只能夠同時感應一點，點先做到呢種效果？答案就係借助類似電腦RTS嗰種滑鼠搭鍵盤組合按法，一次過串聯想同時行動嘅部隊，Group起佢哋之後從而變成齊齊出動。另外仲可以用十字掣同輕觸筆嘅配搭，將卡片擰左擰右以令計略發揮最佳效用，方便攻城時一口氣解決對手。
港日網上鬥兵法
NDS活用Wi-Fi室內對戰甚至係WFC上網Link機，營造甚具規模嘅網絡機舖效果，好似《三國志大戰DS》呢隻咁有街機Feel嘅作品，到處搵勁人決鬥感覺更比《Pokemon》與《DQMJ》等培育型RPG來得實在，而且贏得人多戰績好個朵就會仲響，好似「指揮官」、「右將軍」同「霸王」呢啲稱號就只有喺網上全國對戰中取得，咁嘅虛榮感真係有錢都買唔到。想做受萬人景仰嘅三國霸王？努力練多幾局啦兄台。
初步睇都幾好玩，諗唔到用輕觸筆都可以咁過癮，畫面亦算唔錯，啲卡跟足街機當然勁正。
原創性高但嫌手感不足
近日各大遊戲討論區與新聞組，尤其係NDS專區幾乎因呢隻卡Game淪陷咁款，十居其九嘅Post都係問點玩、咩卡好用同埋邊度仲有得賣，算係近幾個月難得一見嘅盛況。而機主點睇同業內人士都幾唔同吓，班街機高手佢哋玩咗兩三鋪就宣布放棄，話操作同手感根本唔係嗰回事，會學壞手勢喎！至於Game書編輯則覺得若以手提遊戲嚟講，佢絕對係值9分，同人挑機嘅感覺又係極爽，起碼香港機舖都冇得同日本仔隻抽啦！
順帶一提，𠵱家香港街機版嘅Ver.1.1終於推出連線服務，雖然只限本地，但算係踏出第一步，相信今後嘅《頭文字DVer.4》都會係咁搞法。
查詢：I-Gamer.com.hk
電話：27253338
機種：NDS
廠商：SEGA
類型：SLG
人數：1-2人
價格：約$420
（限定版$880）
