「里昂喺足智彩嘅賠率仲好熱，怕且都無人問津；而睇埋隊波近4場聯賽未贏過，係咁失分輸波，禮拜三喺法足盃作客馬賽，你仲敢唔敢追？」
里昂呢期衰到貼，前晚主場對住排尾二嘅尼斯都和1:1，熱爆燈嘅1.2倍W都泡湯，認真得人驚；全場最唔開心嘅球員可能係巴路士，話晒佢加盟里昂後第1次踢正選，仲入埋波，點知球隊都失分。家陣里昂奪標賠率由1.001倍微調至1.002倍……，係就係微不足道，但賠率企硬好耐終於有變，算係少少突破啦。
費特完場前射失12碼
我哋體育版上個禮拜至提到，里昂呢期不斷累街坊，都係咪追捧；講就咁講，應該仲有唔少人前晚博佢反底，搵里昂熱W或「主勝」串過關，結果信者瞓直！當巴路士喺上半場40分鐘接應高禾傳送扳平後，里昂有足足50分鐘再入波，而事實上佢哋有好多「餐士」。
去到完場前8分鐘，里昂得到12碼！機會嚟啦，劊子手係費特，雖然佢係後備上陣，但話晒歇冬後入過兩球（已經冠絕全隊，腳風最順），以為靠得住，又點會諗到佢會宴客咁衰仔？就係咁，熱W同埋買咗「大」嘅捧場客喊得一句句。講到形勢，由於里爾同日贏波，追到只落後里昂13分，記憶中，里昂個1.001倍標賠率企硬約兩個月，而𠵱家只係微調咁少，有冇人買㗎？