唔少球迷話歐洲4大聯賽中最難估英超，呢點我絕對認同。但若大家唔多心嘅話，主力攻「4大家族」曼聯、車路士、阿仙奴同利物浦主場贏波，到目前為止勝出率有72.9%。雖則賠率熱啲，但勝在夠穩陣，要嚟做過關膽都得。
曼聯今季成績咁好，除咗整體球員發揮出色外，傷兵較少亦係原因。今場對住包尾嘅屈福特，贏波問題唔大。但係馬會主客和：主勝開嗰1.1倍，實在太熱；「讓球主客和」嘅「主勝」[-2]又略嫌讓得多得滯！紅魔今季12次主場，只有3次淨勝對手3球或以上，嚟緊周日仲有場硬仗要作客熱刺，今場係咪仲有必要大炒對手先？雖則屈福特作客仲未開齋，但淨輸3球或以上至今只得兩次。睇完數據，我寧願要「讓球主客和」嘅「和局」，博曼聯淨勝兩球好過。
正所謂寧買當頭起，踏入07年，雷丁喺聯賽同盃賽都未輸過，主場更加3戰全勝兼攻入12球，氣勢仲勁過4大家族。相反韋根霉運纏身，連續7場聯賽輸晒！雷丁仲唔趁佢病攞佢命？
阿鵬
有線球彩台主持
電郵：[email protected]