啱啱加盟全球最大私募基金Blackstone、出任大中華區主席嘅前財爺梁錦松，終於重出江湖，佢老哥閒時除咗享受天倫之樂，同埋全情投入小母牛慈善活動外，仲不忘以專業知識報國，就係擔任工商銀行嘅獨立非執行董事，提高國有銀行啲公司管治水平。
根據工行公告講，喺啱啱舉行完嘅董事會會議上，通過咗獨立董事及外部監事嘅津貼議案，松哥係工行三名非執獨董之一，仲擔任埋戰略、審計、風險管理、提名與薪酬委員會等委員，原來獨董基本津貼每年30萬元人民幣（下同），每做一個委員會職位，再多三皮嘢（3萬元），加加埋埋，每年獲得津貼46萬元。以松哥未做財爺前，年薪都二千幾萬計，呢筆董事袍金梗係濕濕碎。
[email protected]