18歲仔，第1次踢意甲後備上陣4分鐘就入波，成為日本球員喺意甲最年輕入球者，係咪好似《足球小將》嘅情節呢？森本貴幸前日入波，協助卡坦尼亞迫和阿特蘭大，轟動意甲球壇，仲令叫人重插阿特蘭大W嘅著名足球網站sportinglife失手，呢鋪大家都走漏眼囉！
可能因為卡坦尼亞過去一個禮拜踢3場波，個個殘晒，令教練馬連奴決定完場前6分鐘換森本貴幸落場博一博，結果呢個小伙子喺88分鐘控定隊友傳中，再擺脫敵將後近門射入，成為球隊救世主，成班友圍住佢慶祝。
唔講唔知，原來森本不嬲係紀錄王，當年15歲就成為日職最年輕上陣球員同埋最年輕入球者，今次嘅成就，簡直可以媲美當年首次踢意甲，即刻對祖雲達斯梅開二度嘅大師兄中田英壽。
以史比尼斯為目標
賽後click入卡坦尼亞官方網（www.calciocatania.it）首頁，就睇到森本嘅入球片段同埋訪問，佢喺入面提到最仰慕球隊首席射手史比尼斯，話對方係佢嘅奮鬥目標。唔紅嗰個唔講，好！有志氣！
「森本樣貌酷似本報某位NBA名家，所以我求大俠季前已開始留意佢；而卡坦尼亞嚟緊會鬥巴勒莫、費倫天拿，遲早有直播，球迷好快睇到佢有幾多斤両啦！」