擁有10年歷史嘅知粥嘗樂，最近新出個咖喱雞同牛腩煲仔腸粉！問身邊朋友有冇聽過，個個都話：「搞乜鬼呀！無端端用腸粉做煲仔，都唔夾嘅！」為咗要知內裏亁坤，我立即去試，結果是超乎想像的美味！原來師傅足足花了3個月研究，不斷嘗試才發明到獨家撚手腸粉煲！
記者：林思樂 攝影：陳盛臣
Model：Bonnie
米漿份量關鍵決定
知粥嘗樂已開業10年，上月銅鑼灣總店已搬到灣仔，提醒大家搵食要知「碇」。向來以現場新鮮即製腸粉馳名，其牛脷酥更做得特別出色，是老闆研究半年的成果。最近佢又有新搞作，就是煲仔腸粉。
好多人一聽到都會問：「究竟夾唔夾㗎？」感覺上腸粉好易黐底，和配料味道又好似唔多夾，知粥嘗樂老闆話：「我哋研究咗3個月，試過用平日自己做的和出面買的腸粉，但效果都唔好，後來在做腸粉的米漿份量上作不同嘗試才達理想效果。至於配料就刻意選香口嘅牛腩、肉醬和咖喱雞，希望較易令人接受，在醬汁濃度、烹調火候及時間，都試過好多次先成功。」可見成功秘訣在於不斷嘗試。
三個月研製成果
牛腩腸粉煲$25
最多現場食客捧場，個個讚不絕口，牛腩煮得好腍好入味，濃郁的腩汁帶點甜，撈腸粉零舍開胃。
咖喱雞腸粉煲$25
咖喱汁一點都不辣，帶有淡淡香味容易入口，醬汁多得撈勻全部腸粉都綽綽有餘，雞肉非常嫩滑。
肉醬腸粉煲$25
最受小朋友歡迎，老闆話剛推出時有個小朋友每日都來幫襯，食足兩個禮拜。新鮮番茄煮成的醬汁與碎牛肉味道配合得剛剛好，非常鮮甜醒胃。腸粉煙韌彈牙，好滑好入味，與醬汁出奇地夾。
鎮店之寶
重量級牛脷酥$5
屬鎮店之寶，用咗半年來研究秘方製法，外層香脆得像酥皮，內裏卻像威化餅般鬆軟，甜味剛剛好，拎上手不會油淋淋，可擺放更長時間都不會變腍。
艇仔粥$13.5（上）
炸兩$9（下）
知粥嘗樂的粥選用較爽、滑身、有米花的米，煲出來才會又綿又有咬口，米粒不會完全溶掉。炸兩外滑內脆，芝麻自家炒成，香脆得像瓜子。
即製腸粉日賣600碟
新鮮腸粉每天由朝早7點開舖至半夜3點收舖都不停邊製邊賣，單單是灣仔店1日就要整300底，即是1日賣出600碟腸粉。知粥嘗樂依照傳統的布拉腸粉製法，所以做出來的腸粉特別晶瑩剔透、特別滑。
食客勁Buy
江生：腸粉煲好好味，牛腩好腍，腸粉好滑，撈埋腩汁好正！
黃生：牛腩正，好腍，油份適中。
何生：個牛腩腸粉煲好好食，會推介畀朋友。
陳小姐：牛腩腸粉煲好好食，好入味，唔油膩剛剛好。
黃生：牛腩和腸粉味道好夾。
Bonnie：真係估唔到腸粉都可以用煲仔煮，而且好滑！
腸粉種類小檔案
牛肉腸、叉燒腸、炸兩用腸粉：
腸粉皮最薄，因為牛肉、叉燒、炸兩等餡料的口感已非常豐富。
蝦米腸、白腸：
腸粉皮較厚，因為蝦米餡料清淡，白腸更沒有餡料，腸粉皮要厚一點食落才有咬口。
煲仔腸粉：
腸粉皮最厚，所以容易入味，捲得比較鬆，中間留有空間讓醬汁滲入。
睇路搵食
知粥嘗樂（28911155）
地址：灣仔天樂里5號地下
營業時間：7:00am-3:00am（腸粉煲每日11:00am開始供應）
交通：銅鑼灣地鐵站B出口沿軒尼詩道往灣仔方向直行至馬師道，過對面馬路即為天樂里。