「油魚風波」延續，食家一褲都係。《文匯報》報道本港每年進口油魚三千噸，PK超市只佔六百噸，其餘二千四噸無法漏出公海，肯定已攻入尋常百姓家，跟真身鱈魚咁高咁大。油魚的出產地澳洲有嚴格指引，絕對不能出售與加工，無利可圖，照理沒辦法從中取利。無奈奸商天賦精明眼，睇通油魚能魚目混珠扮高貴，遂斬件附運。這場油魚風暴令本來對污染海產聞風喪膽的用家，更加不敢碰凍魚。對魚肉禽畜失去信心的市民甚至擔心總會有一天，超市會出售「油菜」，標明「有機」，原來是在工業廢墟用「機油」灌溉耕種，慌你唔死！
油魚產地澳洲有錢唔賺，油魚斷估唔慌好嘢。港府堅持油魚無毒，只是個人體質不同，等於有人對花生敏感，但政府不能禁售花生。屙油不是屙血，看來很快成為民間智慧瘦身方法。自創「排油美顏寶」的OL，真人示範功效顯著，到時人人由怕油到搶油，油魚熱賣（附送隔油底褲），身價暴升，政府今日決定不禁，當真英明神武。
油魚翻身第一式是超市集團大幅提高價錢，專攻港人平嘢冇好的觀念。第二炮是搵靚女做代言，製造一窩蜂纖瘦「潮油」。靚女唔制就搵迫爆公私醫院的靚媽，免費幫她們去油減磅，內地孕婦冇這樣的優待，香港產婦就算瞓走廊床位，條氣都順番唔少。