廖啓智同陳敏兒兩夫婦前晚喺元朗神召會錦光堂出席佈道會，同大家分享見證，估唔到反應咁熱烈，個堂迫爆成千人之餘，教堂外面仲打晒蛇餅，後嚟因為人太多嘅關係，有市民可能唔知到發生乜嘢事，竟然報警。教會方面為咗疏導人群，最後決定加開一場佈道會。
憶愛兒眼有淚光
智叔同敏兒講番細仔樂樂上年血癌過身前所發生嘅事，佢兩個要經常進出醫院，陪個仔睇醫生，智叔話：「樂樂信賴耶穌後，已經唔怕疾病同死亡，而我哋一家人因為有咗信仰，心中因為有主耶穌，對親人離世呢個打擊，終於可以捱過。」
現場又播放咗智叔夫婦同樂仔生前一齊嘅生活片段，短片中佢哋一家人笑得好開心，但睇緊片嘅智叔同敏兒觸景傷情，眼有淚光。
