喺《香港討論區》，有網友話最近港股波動好大，一時勁升逾400點，一時又跌番凸，後市好難預測，持貨嘅散戶固然驚俾外圍因素拖累，搞到要蝕錢；高追嘅散戶更加擔心，大市會唔會一沉不起？咁搞法好易鬱出病，究竟股民最常患乜嘢病呢？
大多數網友都話股市大上大落，最易患上嘅當然係心臟病同高血壓。正如網友X次方話：「基於股市過度刺激，散戶好易會有高血壓同心臟病；過度緊張嘅話，可能會導致尿頻；如果見到大市急跌，可能會因過度躁火而流鼻血。」
網友plsquickla加把嘴話：「經常要睇住個市，搞到頭暈腰痠，如果股價跌破買入價，更會煩躁不安、心悸失眠，根本冇精神做嘢。」
開股疾研究所搵番筆
hkboyhk2就從中發掘商機，笑言：「既然股民會有咁多病痛，可以開番間股民疾病研究所，唔驚冇人幫襯。」
除咗身體上嘅病痛，網友waihung668認為股民仲有好多心理病，例如自以為是，以為自己係畢菲特，到有大調整時，呢班人一定死梗。