特首曾蔭權今個月中整咗份《「十一五」規劃與香港發展》行動綱領出嚟,其中一點係要將香港打造成「國際航運中心和空運及物流樞紐」,物流業似乎前景無限好;但一班業內人士唔係咁睇喎,佢哋認為香港物流係夕陽行業,更謔稱物流等於「勿留(低)」行業至真,有得轉就要快啲轉行咁話。
網民loveucrazy1221喺《香港討論區》好感慨咁話:「當我見到大陸啲機場、碼頭越嚟越多、越嚟越大,就知道香港嘅貨運物流業已經去到夕陽期。因為香港貨靠大陸生產出口,既然人哋有能力自行出口去其他地方,仲轉落香港把鬼咩!」
從事空運業嘅msnlover就認為,香港空運業雖然現時仍有優勢,但覺得前景差,所以做咗十幾年都選擇轉行,因為怕過幾年無得做,到時又轉唔到行仲慘。
另一位從事空運業嘅網友老行踢爆,「空運好乜鬼,日日得三幾單(生意),惟有玩吓數讀過日神。」不過,佢無講明自己做邊間,唔知係咪個別公司、個別事件呢?
原機轉貨自己玩晒
網友一個都不能少講嘅經歷,就更值得大家深思,佢話:「同樣一個遊戲,雖然越玩越大,可是能夠參與的人將會越來越少,因為很多貨根本不用離開機場,甚至不用離開同一架飛機。」
難怪國泰航空(293)都選擇肥水不流別人田,要爭取自己獨資起個空運貨站。曾特首真係要聽吓業界人士心聲再對症下藥,唔好空口講白話。