呢幾日氣溫又跌番落10℃，打邊爐、煲仔飯馬上一街都係，講真又點及一煲老火清燉嘅滋補湯水來得咁暖胃窩心呢？約靚女港姐葉翠翠同王貽興試盡香港靚湯食府，翠翠話：「屋企湯固然好，不過工夫繁複，唔係個個有時間整！」好似花膠、水魚、鯊魚骨呢啲大Project靚湯，原來落正料、冇味精都係百幾蚊一盅，識搵飲湯名店，又何需苦了自己呢？
記者：朱崇德
攝影：楊錦文、陳陶鈞
化妝、髮型：JamieLee@beautypro
服裝：K-2
女士恩物 花膠夠滋補
花膠滋補養顏，含豐富骨膠原，最啱女士飲；不過有留意新聞者，都知最近海味價格上調，花膠價格1年間扯高4成，馬上變成一種「富貴」食物！但花膠大王竟然可以$98做一塊湯碗口大的花膠扒（足2人份量），做慣《最緊要正字》嘅王貽興即問個究竟，老闆娘陳太話：「其實本身我哋係做花膠入口生意（1年約1,500噸），將魚卜製成花膠，經總代理再分發西環海味舖，香港7成花膠都係經我哋手製造，所以市面價格浮動唔會對我哋有影響。」
1.佛跳牆$268
王貽興一聽話有佛跳牆食就話：「咁大個仔第一次食，幫我影相留念！」裏面有34頭吉品鮑1隻、豬婆參1/4條、5至6吋金山勾翅1塊、花膠5両，鮑參翅肚樣樣齊，再加響螺片、老雞及豬肉，單材料價都唔少嘢！湯入口清爽唔膩口，仲有滋陰補肝明目、養血潤燥的功效。
2.響螺燉老雞花膠湯$138大 $48細
翠翠自細最愛媽咪靚湯，不過呢個亦好有HomeFeel，響螺配老雞係一個清而鮮甜的配搭，加入花膠，味道更清爽突出。
3.竹絲雞燉花膠海參湯$98大 $48細
呢個亦係較味清滋補湯，花膠加入竹絲雞及海參，有補氣療養、補血、調經等作用，對女性尤佳。
花膠大王（27857721）
地址：九龍美孚新邨荔灣道12號B地下
浸花膠秘技
花膠要做到口感爽滑，最重要係浸發工序。坊間一般做法是先浸水、後出水，但陳太話：「浸水先令花膠軟化，再煲就會令膠質流失兼唔爽口，此為錯誤做法！」正確做法應為先出水、後浸水，落煲出水時間好重要，要就花膠厚薄、大小而掌握時間，要做得咁爽口，完全係經驗！」
弱者無懼 雞鴿魚勁補
旺角帝京酒店帝京軒，每年入冬最出名都係個燉湯！中餐行政總廚Dicky解釋：「一般老火湯味道會濃啲，多具清熱下火功效；但燉湯不同之處，係味清而慢慢滲出，材料唔係直接受火，唔會影響食材之藥性，所以多有大補之用。」最近新出以乳鴿、魚皇、老雞、水魚為題的飛禽水產燉湯，平時屋企整，真浩瀚如希望工程，喺家畀百幾蚊飲到，方便又快捷！
4.川芎白芷燉魚皇湯$58
大廚話川芎白芷再加天麻可祛頭風，藥性溫和，多飲亦唔怕！當中的燉魚皇，以3斤以上的斑骨配斑腩同做，魚味鮮甜非常。
5.肘子花膠燉水魚湯$88
水魚及花膠雖有滋陰護膚等功效，但味較清淡，大廚以肘子添味，湯水散發陣陣火腿濃肉香，襯托老雞清甜湯底。
6.酒糟當歸木耳煮雞湯$55
以老雞、雞腳等底料先燉4小時，要做出香濃的鮮雞香，後加當歸燉1.5小時，兩者味道相夾，又有行氣活血藥效，寒底人最啱飲，上枱前再加入木耳、雞件及釀紹興酒的酒糟，入口先有酒香、雞鮮味。
7.香露紅綿燉乳鴿湯$188
乳鴿除為湯帶來鮮味，最重要係有滋陰固腎功效，香露其實是一種冬菇，有消炎殺菌的藥效，配以紅綿（魚肚）同燉，入口更清香細滑，最重要是火候控制，乳鴿要與雞腳、老雞、豬肉、豬背骨等底料先燉上4.5小時，後加冬菇魚肚再燉1小時。」
帝京軒（26226161）
地址：九龍太子道西193號帝京酒店3樓
燉湯小秘技
用保鮮紙蒸餸已經唔係新聞，但以保鮮紙蒸湯，好多人未必知其好處：「湯水受熱會直接啲，湯色會清啲、味道亦會濃啲！」不過「落紙」時留意，要以手留開一邊口，中間施壓按出空氣，咁放入蒸爐時，就唔會因氣壓改變而「自動開口」，咁就包保存氣又好味！
啱捱夜人士 清潤鮮蘋果
佐敦有間頭啖湯，睇名都知以湯主打！老闆秦生話：「中國人特別廣東人對湯水非常看重，其實燉湯好簡單，最重要係用料鮮而足，我就用鮮蘋果煲湯，貪夠清潤，老少咸宜！」據知每日賣上200盅，好多OL仲特意打電話訂位留湯！
8.沙參玉竹燉豬𦟌湯$38
係捱夜人士救星，雖則味道大路，但清熱藥效特高，熱底、燥底一盅清涼晒。
9.鯊魚骨燉竹絲雞湯$38
竹絲雞雖清，但加鯊魚骨馬上變得濃厚，鯊魚骨有解熱毒功效，據知是附近OL至愛。
10.蘋果南杏燉生魚湯$38
補湯唔係人人飲得，頭啖湯呢度有啲主打清潤湯水，不溫不燥，趁住冬日天氣亁燥，潤番吓啱啱好，新鮮蘋果配以鮮磨南杏漿、榨汁，再加生魚清燉，果鮮魚鮮清心潤脾胃。
頭啖湯（29578998）
地址：油麻地廟街259A地下C座
方便之選
速遞湯唔使煩 OL最Buy
限時、限刻又要限住地方飲靚湯真係唔方便，如果速遞到你Office或屋企又如何？中國湯店已經營靚湯速遞9年，基本只做尖沙嘴、香港堅尼地城至鰂魚涌一帶的寫字樓，但如果一次訂幾支，過$250可送到九龍區，過$500更可上住宅！負責人話：「我哋嘅湯全無味精，可能係成為中環一帶OL至愛原因。」
亁鮑魚魚唇火腿雞湯$60
店舖招牌湯，以魚唇、鮑魚仔、瘦肉及花膠熬足5個鐘，感覺好傳統，不過好多OL話飲咗一段時間，皮膚會滑咗，而且胃病都冇埋，所以係最熱賣湯水。
胡椒白果豬肚杏仁湯$45
胡椒豬肚，一睇就知係驅風去寒湯水，而白果對腦部有益，杏仁腐竹正氣對腸胃好，上班族至啱飲。
鹿茸黨參北芪竹絲雞湯$80
血氣不足女性嘅恩物，飲後仲唔會經常手腳冰凍，絕對滋陰；不過有病就不宜以此湯進補。
中國湯店（28183770）
地址：香港堅尼地城域多利道64號廣基工業大廈7樓A室
網址： http://www.chinesesoup.com