星展銀行舊年底更新品牌，以「新亞洲英雄」（AsiaHero）做集團主題，兼且貫徹喺今年印刷嘅日曆上面。由內部推薦35名符合新亞洲思維嘅港、星型男型女同事，將佢哋容光煥發、做得又玩得、親切友善兼精力充沛嘅一面，攝製成靚相，輯錄喺日曆內做插圖。
佢哋個個笑容燦爛，例如內頁一個頭戴冷帽者、好似喺度打緊功夫嘅型男，原來係星展新加坡推廣傳訊部嘅同事，係咪有啲明星feel呢？
影完相仲有下文，啲員工意猶未盡，搞咗個員工投票選舉，揀吓邊位係型人中嘅型人，結果Top3由兩位新加坡及1位香港員工勝出。
香港得獎者，乃掌管人力資源嘅阿頭Blanche陳靄紅，頒獎禮都好認真，高層戴國良都嚟做嘉賓玩埋一份。
聽講星洲玩得仲激，佢哋將有份選為日曆人物嘅同事照片，移師至交通工具如的士、巴士或大型燈箱上，做生招牌穿街過巷，又幾好玩噃。
[email protected]