豪門第二代男子組裏面，有少部份真係好介意俾人叫二世祖，於是潔身自愛勤力做嘢（至少響公眾面前），但亦有大把人唔mind世俗眼光，日蒲夜蒲，以「𠝹」女上娛樂版見報為終身成就，俾人響香港影到已經咁豐富，出咗香港自然更奔放！其中一個「性地」係成日都話可超越香港嘅上海！
好似銅鐵老字號昌記太子爺，呢幾年成日上海香港兩邊走，話就話為家族事業賣命，但似乎響夜場更有成就，媾女更可以講係無往而不利！據外灘小探子回報，太子爺通常係星期五夜機飛上海，落機即刻巡視「業務」──到各大蒲點報到。
舊相好同枱
話晒係上市公司老闆有頭有面，但次次都唔坐VIP房揀大廳，當然唔係為咗慳minimumcharge啦，大廳一眼關七唔會走漏眼嘛！據聞佢戰績最彪炳嘅係VIP房一役，離場時一拖五塞爆架藍色S-Class。
其他第二代呢？好似錢莊寶貝仔先排鍾意蒲官邸，戰友除咗一班知名度唔太高嘅二世祖外，有時會見到中風富豪個ex-girlfriend話梅！點解寶貝仔同話梅同枱？有幾奇，大家都係「搵食」之嘛！
講開話梅，小探子話，話梅呢個「名媛」細細個出嚟搵食，雖然個樣唔索，但外省妹勝在熱情搭夠，自從男朋友中風「從良」後，佢重出江湖搵食，雖然已經掠咗前男友大把水，但仍非常進取務求再搵件，最搞笑係試過同10年前嘅舊相好同枱，唔認得對方之餘兼夾重新媾過，果真係「食住等好過餓住搵」！
查實黃浦灘仲有好多私竇，但可能有狗仔隊跟係身份象徵，所以班第二代都繼續去呢啲大家都去得嘅蒲點，近排比較hit嘅有嘉玲姐間Muse同埋WynnWin，平民如你我，若想搭上名公子名媛，不妨去碰碰運氣！
[email protected]