再有地皮被勾出，又有機會可以炒作一番。fansofbrucelee從一個小市民嘅角度去諗賣地，喺《香港討論區》問：「發展商高價買地用意為何？近年發展商一直以高價買地（唔只係豪宅），佢哋係儍呢，定以為賣發水樓就得呢？」點解會覺得發展商儍？原來佢認為：「𠵱家普通地都高價買，豪宅地價直情令人不禁要問句，佢哋係咪真係儍咗？」
托價都要銀行肯借
victoriaahpak第一個答：「顯示對樓市嘅期望。其實，買地對市場指標好緊要，好多人話地產商托市，所以頂高個價，但其實買地都要向銀行借貸，塊地如果銀行認為唔值，咁個地產商借唔到錢嚟發展就好弊㗎喇。當然，跌市係會有可能，就好似當年信置（083）買藍灣半島塊地時咪咁囉，但係，從賣地你可以睇到銀行甚至測量師對樓市前景的估計。仲有，當然係要講大地皮啦，譬如你有兩塊好平嘅地皮，中間嗰塊，你可能會用高價嚟投，因為到時可以連埋3塊地一齊推盤，個價咪高囉。如果唔係，無啦啦買塊貴地返嚟，又借唔足錢，俾股東插到飛起都似，其實有啲睇好樓市嘅原因，都同投地價有關。」
至於tmar就針對豪宅地咁樣答：「豪宅同平樓唔同，因為香港有錢人同窮人都一齊多起嚟，中產會開始少一啲；另外大陸啲有錢人都想喺香港買間豪宅投資，所以豪宅啲價錢不跌反升。」
mch411答得仲高：「毛利率不變，生意額越大，利潤越大。」唔明唔緊要，當一個另類睇法啦。不過，fansofbrucelee好似明，所以佢反問：「即係發展商都預計第日啲樓可以高價賣出？」胡緊途接力答：「唔係，係諗住發水賣出。」
預咗日後發水賣出
dansan168嘅答案仲得意：「因為要畀着數政府，等第時賣縮水、發水樓時，政府都唔會出聲！」abcpqr接力：「地產商有絕對發水權，呢個係利潤保證，喺樓市低迷時，佢哋都一樣有錢賺，當樓市起飛時，咁就直頭賺一兩個開；官商關係非比尋常，一齊賭馬一齊搵食，退休後仲有大錢搵。」
畢竟大家都只係普通小市民，買地起樓基本上只係茶餘飯後嘅吹水話題，大家以小市民嘅幽默感去窒商家政府，先係網上自由嘅可貴之處。