爾冬陞執導演筒多年，雖說開設的是獨立小公司，但曾合作的好演員不計其數，包括梁朝偉、劉德華、張國榮、劉青雲、袁詠儀、張栢芝等，演技派巨星雖是不少導演嚮往的合作對象，但有得必有失，行內人皆知「湊星如湊兒」，噓寒問暖少不得。對此，小寶劈頭第一句就說：「演員邊使湊㗎？演員就係演員，我唔覺得因為我喺呢行有江湖地位或者你話我有say（話事權），所以啲演員唔敢蝦我。」
小寶續說：「我合作過嘅演員大部份都好明白事理，好似你問我劉德華係咪提議過想喺《門徒》演吳彥祖嘅角色？係，不過我解釋過畀華仔聽之後，佢好快就理解咗，講道理嘅。」
要小寶論盡當今實力派演員，他認為梁家輝、方中信、黃秋生都係好好的表演者。當然好演員還有不少，以下幾位就是：
劉德華 淡化偶像感覺
佢𠵱家嘅發揮好老練，同佢拍《烈火戰車》時分別好大，內斂同歷練多咗，發揮得好好，偶像嘅感覺愈來愈淡化。
梁朝偉 潛力未盡發揮
佢同我合作過《癲佬正傳》同《人民英雄》，仍然係我好心儀嘅男演員，好希望可以再同佢合作。佢𠵱家經常拍王家衞嘅電影，但可能合作得太耐少咗火花，因為佢哋太熟，好難好客觀咁睇到偉仔潛在嘅能力，其實佢仲有好多空間可以發揮，會唔會再合作就要睇緣份。
楊千嬅 肯做肯試有機
喺未拍《千杯不醉》前，邊個夠膽叫佢去做啤酒女郎？𠵱家證明佢仲有好大潛力，佢係一個好肯做同演嘅演員，只要佢敢去試就可以再上一層樓。
郭富城 爛撻撻大突破
雖然我未同佢合作過，不過睇過《父子》之後，對佢改觀好大，成熟咗唔在講，你幾時見過佢爛身爛世去拍戲？佢擺脫咗偶像身份，係一種突破，好成功。
吳彥祖 打好中文基礎
好耐之前已經識佢，當時佢話會入行問我意見，我同佢講叫佢學好啲中文先講，𠵱家證明我冇講錯。
古天樂 主動更添信心
同吳彥祖一樣都係上緊位嘅演員，古仔演出穩咗好多，以前佢太過被動，未必有得發揮，拍完《寶貝計劃》之後，佢啲信心返晒嚟，行步路都有信心啲。
