由出爐金球獎喜劇/音樂組影帝沙格畢朗高漢（SachaBaronCohen）主演嘅《波叔出城》（Borat），當選《時代》雜誌年度10大影片之一，喺美國當地仲爆冷狂收逾億美元，點解？因為套片喺笑爆嘴嘅情節中，處處反諷大美利堅文化精神，當然唔係麻甩阿叔搞搞震得啖笑咁簡單啦！ 撰文：戶川淳
本周四（2月1日）正式本地上映嘅《波叔出城：哈薩克鄉下佬去美國搵著數》（Borat:CulturalLearningsofAmericaforMakeBenefitGloriousNationofKazakhstan），以獨特角度揭開美國文化可笑嘅一面。
大男人猛撞板
沙格畢朗高漢扮演一名嚟自哈薩克嘅電視台記者「波叔」，佢原本有感於自己國家長期處於貧窮，所以獲政府委派飛去美國拍齣紀錄片，希望讓國民認識到美利堅犀利之處，以助哈薩克「脫貧」，但後來佢喺美國竟然愛上美國性感代表彭美拉安德遜（PamelaAnderson）。
秉承套片嘅低成本製作，個開場已經十足製作簡陋嘅哈薩克新聞片，非常頂癮，電影仲以偽紀錄片（mockumentary）形式拍攝，同時仲好有美國公路電影色彩。再加上波叔滿腦子係傳統死板舊思想，既大男人又反猶太人，喺採訪旅程中處處觸及敏感嘅宗教、種族同女性主義等禁忌同話題，自然激到唔少人有氣無碇唞，但同時亦反諷美國人一樣係好死板同樣又唔容許其他人挑戰權威嘅小家本性，簡直係對口口聲聲講自由民主嘅美國來個當頭棒喝。
拖女四圍踩場
最搞笑係套片尾聲有拉姑真人亮相，佢喺唱片舖舉行簽名會嗰陣，失驚無神獲波叔求婚，以為畀癲佬擒，嚇到花容失色。為咗貫徹電影嘅偽紀錄片手法，沙格上年仲以波叔自居，帶埋一班比堅尼女郎到康城影展「踩場」，喺套片上映前又走去華府請願，令波叔恍如活喺現實生活之中，搞到連哈薩克政府都走出來澄清，話波叔同佢哋毫無關係，真係玩到出晒位。