韓國男歌手Rain噚晚喺大馬舉行演唱會,前晚佢飛到當地時,有百多名歌迷湧到機場接機,現場一度混亂。Rain開騷前舉行咗一個20分鐘嘅記招,其間不時展示佢嘅矇豬眼笑臉冧歌迷,講到最近韓國女歌手Uinee因不堪壓力自殺身亡,Rain就話自己冇壓力,每次喺舞台上只會做到最好。至於拍戲拍上癮嘅佢,仲話想完成巡迴演唱會後,接拍史詩式大製作劇集㖭。