2006年樂壇最後一張成績表、港台《十大中文金曲頒獎禮音樂會》前晚圓滿結束，各大小獎項塵埃落定，而兵家必爭的靚衫戰場，卻沉悶兼千篇一律。本報昨日邀請時裝設計師鄧達智品評眾歌手的服飾，他說：「香港就係咁，興乜就個個着，但冇一個令人眼前一亮。」
下月便60歲的鄭少秋，打低一眾youngguys，「有型有氣派」，突圍而出成為全晚之冠，勇奪Bestdress金獎；反而闊別樂壇的陳慧嫻一身70年代「黎愛蓮上身」造型，與賣行Fendi廣告的容祖兒，一個過期一個過火，同樣失禮。
採訪：林妙萍
攝影：仇志德、陳順禎、葉君海
-最佳衣着-
金獎 秋官長褸瀟灑
評語：「正！好犀利，老當益壯！男歌手個個正路着tuxedo，惟獨佢夠膽、有heart，着番自己一向嘅瀟灑大俠長褸，最有氣派，內外顏色襯晒，同個age又好夾，絕對正斗！」
銀獎 千嬅桃紅搶鏡
評語：「應該係佢幾個頒獎禮最sharp之作！唔使攞獎都搶晒鏡，桃紅色對比黑麻麻嘅背景，一望就好突出，同埋佢放棄同成班女歌手爭着短裙、高跟鞋，轉為長裙配白波鞋，係比較少見wholesome之作，仲成功避開變做扮可愛少女嘅危險。」
銅獎 衞蘭原創夠格
評語：「佢着衫一向好嘥嘢，着到自己好累贅。今次唔跟潮流，走偏鋒着CommedesGarcons，反而有原創味道。可能有人會話白色着到佢好肥，但佢一向唔係sell瘦身靚女，賣歌喉講個性，白色係goodpick喎！」
-最爛衣着-
爛金獎 慧嫻似黎愛蓮
評語：「十足一個修女look，上台一啲都唔起眼，腰位cutting又錯，似70年代黎愛蓮嘅造型，連髮型同化妝都似埋，好過時！」
爛銀獎 祖兒人肉廣告
評語：「本來條裙清清哋、亁亁淨淨係冇問題，但作為一個artist，孭住咁大個logo上台，好似幫Fendi賣廣告咁，多咗啲，唔係咁啱身份。」
