選角棘手 𢱑料深入黑社會<br>爾冬陞開戲險過炒股

選角棘手 𢱑料深入黑社會
爾冬陞開戲險過炒股

電影圈大水喉來來去去那幾個,有戲開的導演來來去去也是那幾個。
如果你懶得與意氣風發的大老闆周旋,求人不如自掏腰包開戲,爾冬陞就是好例子,按樓都要拍!
他說開《千杯不醉》風險如炒股,是對主角號召力沒信心,還是劇本抑或自己導演功力的問題?真的這麼危險嗎?
危得過向黑社會大佬攞料寫《旺角黑夜》及《門徒》?
危得過遇着短視歌星想用十日拍一齣戲?
使錢容易賺錢難,誰不同意?
天下沒有穩賺的生意吧!
撰文:何永寧

拍片 自資為勢所迫

爾冬陞(小寶)拍戲出錢出力,試過按樓來開戲,《新不了情》、《忘不了》、《早熟》及《千杯不醉》等,均以獨立製作形式開拍,即自己做老闆。小寶笑言這是為勢所迫,他說:「其實我都唔係好想,有人支持梗係好,但站喺老闆角度,你又好難要人冒險去投資,拍《千杯不醉》時直情覺得危險過買股票,當然你有數得計,最差都應該可以打個和,不過你知計還計,事實可能係兩樣,好在最後都冇點錯點蝕。」

唔拍戲冇信心

做慣大俠的小寶以一貫俠士口脗說着,解釋為何踩鋼線犯險:「做一個導演唔可以太耐冇作品面世,唔係你嘅意志會越嚟越消沉、冇晒信心,我又唔係好鍾意游說人,你唔拍咪我拍囉。」
人人都說電影市道滑落,罪魁禍首是翻版,其實電影人何嘗沒有責任?小寶表示影圈的問題在於圈中人貪心短視,他說:「我聽過之前有個歌星去拍片,乜嘢都唔得,連頭髮都話唔可以剪多過幾多,邊係拍戲㗎?拍套開開心心嘅片唔使點諗咪算囉,又試過有經理人帶個歌星嚟到開工,話畀得幾多個鐘、畀幾多日你拍呢套戲。咁我話你唔好拍喇,錢係要搵,但唔好貪得咁盡,大家嚟到係想拍好套片,係要拍完套片嘛,畀唔夠時間你叫我點做?如果你話一個導演一年可以拍六部戲,你真係好叻囉,我兩年至一部,啲演員九日十日又話拍完一部戲,仲衰過以前啲七日鮮,咁你咪造成一個惡性循環囉,呢啲演員我寧願sayno。」

寫稿生人勿近

小寶謂電影圈像一個餅,希望越做越大,可以給多些人去分,但不可能越做越次貨,要趕客他寧可趕你走!不過要講要鬧,小寶謂還是留給黃秋生說,他笑言:「佢最有資格,因為佢拍得最多爛片。」
小寶的作品向來多元化,從親情到溫馨,甚至官能刺激如賽車題材的都有,要從事種類繁多的創作自然要代入其中,他曾經因此要接受心理醫生治療,他說:「95年因為寫《色情男女》寫得太投入,搞到情緒低落抑鬱要睇心理醫生,嗰時都好避忌唔敢講,近年講番係希望勸啲人有事要去睇醫生,我寫稿時真係生人勿近,連媽咪喺屋企都唔敢嘈我,因為一打斷思路就好難寫得番,呢樣真係覺得好對唔住媽咪,不過創作永遠係孤獨嘅。」

昆哥來自旺角

寫劇本不能不做資料搜集,這方面小寶覺得特別有趣,過程猶如記者問料一樣,需要「有關方面」幫手。好像籌備《忘不了》時,他就要跟近20名小巴司機打交道。
當拍講述香港黑社會及毒品問題的《旺角黑夜》,小寶更找來有勢力人士做訪問,他笑說:「我要自己出馬見班大哥,料先會多啲。」小寶不諱言為《旺》片做前期工作時引發他對拍毒品電影的興趣,才有開拍《門徒》的意念,他說:「你話《門徒》係《旺角黑夜》嘅副產品都可以,因為劉德華(昆哥)嘅角色當時已經有喺度。」

小寶曾因寫劇本太投入而導致抑鬱,要看心理醫生,又不敢跟人傾訴。

電影市道滑落除翻版造成外,爾冬陞認為影圈人短視兼太計較得失也是原因。

爾冬陞雖憑《旺角黑夜》奪得金像獎最佳導演及最佳編劇獎,但自資拍戲要做到票房與獎項兼得卻一點不易。

爾冬陞為了拍好《忘不了》(圖)向20名小巴司機做資料搜集,也曾為《旺角黑夜》而與黑道大哥打交道。