前日禮拜六，孫柏文喺灣仔會展舉辦嘅「《蘋果日報》07投資講座」首次粉墨登場，作出處女表演。當時喺台上同讀者、觀眾分享自己啲見解同經驗嘅30分鐘，真係緊張到不得了。首先，有靚女主持人介紹我嘅時候，公開咗網友幫我改嘅「股壇黑氣石」花名，仲問我：「今日，你嘅環目叫『從輸錢到贏錢』，咁對檢討以前嘅錯失會唔會有保留？」
對其他人來講，以上嘅問題可能有少少太過尖酸刻薄。不過因為我知道自己罪孽深重（舊年叫人買恒指熊證、花旗國足球隊），所以我亦說明禮拜六嘅演講，唔係做講座而係向大家懺悔。當然，作為「白銀戰隊隊長」，我亦有把握機會向觀眾重申「一注獨贏買白銀」呢個可以對抗「紙幣狂魔」衍生出通脹嘅投資建議。
我記得曾經應承過好幾個fan屎，今日公開點樣買實貨白銀嘅方法。不過因為之後同幾個已經買咗實貨白銀嘅「白銀戰隊」成員，交流咗買實貨白銀嘅心得。所以亦因而得到幾個可以買到實貨白銀渠道嘅新建議，希望各位fan屎可以畀多兩日時間我做啲研究，喺禮拜三1月31日同大家一一分享。
雖然，因為時間關係，當日喺台上只係有機會深入講點解要「一注獨贏買白銀」，不過有有心嘅fan屎記得我都曾經建議過「一注獨贏買和黃」，問我點睇。其實，中長線嚟講，和黃3舊年11月全球推出嘅X-Series收費模式改革，會將3由包袱變成金礦，所以我一定睇好。而短線嚟講，今日和黃旗下嘅和記電訊，將會為售賣印度電信業務開董事局會議。亦有可能喺收市之後，會有決定接受邊個收購建議同售價嘅消息。呢幾日，做13和黃同2332和記電訊嘅股東將會非常刺激。
MoneyHoney又出事
講完和黃，同大家講吓外國發生緊嘅事。花旗國靚女財經記者MariaBartiromo，繼舊年大爆伯南克私底下同佢講市場誤會咗聯儲局加完息嘅消息，繼而令全球市場大幅波動之後，呢個花名叫MoneyHoney嘅女主播，又出事。
聽聞，花旗銀行Citigroup財富管理部嘅全球主管ToddThomson，以「同傳媒建立更良好關係」為理由，攞公司嘅私人飛機，送咗Maria一程，由北京飛往紐約。不過問題係原先呢部飛機係預咗用來接載公司嘅員工，所以令呢班員工要用咗公司好多錢去搭普通航班。結果係，今次「Maria搭飛機」事件，令Todd冇咗份工。
其實，Todd喺Citigroup出名揮霍無度，不過因為Citigroup股價長期落後於其他對手，所以公司為求減低開支，應該已經喺度尋找藉口郁佢。相信大家都覺得Todd今次真係非常唔小心。不過講真，如果換轉係我，有機會單對單同被稱為年輕版蘇菲亞羅蘭SophiaLoren嘅Maria搭好多個鐘頭飛機，就算明知公司要減低開支，都會抵受唔住誘惑。
始終都係嗰句，themindiswilling，butthefleshisweak。
金手指網誌： http://phatdat.blogspot.com