敏妮上星期六去咗《蘋果》喺會展搞嘅投資講座，真係估唔到同一日有成廿幾個講座，絕大部份都係免費，偏偏有成300幾人寧願掏腰包，畀68蚊去撐蘋果，如果唔係撻版主個朵，股王A、光頭仔同敏妮都班唔到飛。
敏妮之前曾經喺呢個欄講明會現身講座，聽在場工作人員講，有位太太問佢：「敏妮嚟咗未？」哈，估唔到敏妮都有fans！真係多謝各位捧場。
上星期五港股再跌400幾點，敏妮以為實係好多人問今日個市升定跌，或者係自己揸住隻股放唔放好？點知聽完佢哋嘅提問，就知觀眾真係好有質素，問嘅係A股同H股投資價值比較、油價下跌對航運股有幾大助力……
光頭仔：「聽收音機，好少聽到啲散戶問咁有內涵嘅問題！」
收錢反能招賢聚眾
股王A：「咁係因為個講座收錢，雖然唔係貴，但出面有咁多選擇，仍然肯畀錢嚟嘅，自然係有要求嘅投資者，只係問冧巴，打電話去電台都得啦！」
突然間敏妮諗到一條生意「方程式」，「就係因為要收錢，所以可以集合到有質素嘅散戶；就因為集合到有質素嘅散戶，所以可以搵到具實力嘅贊助商；就因為贊助商有實力又有具質素嘅散戶，反過來可以請到有份量嘅講者；就因為講者有料，所以可以吸引到更多願意付錢嘅散戶。」
股王A：「敏妮，盤數的確喺咁計，就好似當年city'super咁，當間間超市都鬥平嘅時候，你敢唔敢開一間賣幾十蚊一樽法國礦泉水嘅高檔超市吖？」
「記唔記得《BlueOceanStrategy》（藍海策略）本書，當戰場已血流成河，懂得而有勇氣去開創一個新市場嘅，就會成功！」