上個星期，股市焦點都落喺大笨象滙豐（005）同中移動（941）身上，事關大笨象已經開始發力，追番大市；中移動就繼續做火車頭，帶住大市穩定二萬點。不過，唔知係咪網友之前對呢兩隻股講得太多，即使近期咁旺，網友都冇咩聲氣；反而靜咗一排嘅工行（1398）從高位回落後，網友紛紛在《香港討論區》討論。
網友神通棍以「現價4.71買工商會唔會有工傷」為題，短短3個鐘就吸引超過40個留言。巴治奧話：「你買工傷+國壽（2628）肯定唔會傷，就算大跌，都可以搵2628賠。」
leungleungleung大唱反調：「千祈唔好買，好貴，佢增長好慢，正一大嚿衰呀！」
不過，大部份網友都睇好工行有望被納入恒指成份股。elvinmak2就話：「現價買都唔貴！入咗HSI，幾個月後一定到6蚊。」SHAW更引用昨日荷銀嘅評價，指工行目標價睇5.5元。佢認為工行上破4.8元，仲會標升一段時間。Nocontrol亦持相同觀點，認為工行入恒指，基金必須增持，有望上到5.5元。除工行外，國壽（2628）亦有望晉身藍籌之列。近日兩隻股票均從高位回落，工行及國壽周五分別收報4.59元及23.4元，各跌1.71%及升1.08%。至於邊個能成為恒指新貴，就要等2月9日揭盅。