泛海國際（129）NAV折讓之大，喺香港地產股當中應屬三甲之列，現價翻半番，先叫正常，翻一番，先叫合理。泛海市值15億銀，只係反映到集團揸住大道中泛海大廈嘅價值（市值應該上到12－13億銀），其他投資物業資產，唔通唔值錢？
只係假定，泛海keep住泛海大廈，將其他投資物業照07年度中期賬面值拆件出售，每股套現0.13元。泛海要反映其餘投資物業價值，起碼要翻半番過外，到0.35元。
又撇開投資物業唔講，泛海手頭土儲及發展中物業，賬面值高達28億銀，相當每股0.4元，呢批搵真銀資產，唔通又只值斗零？泛海最新NAV0.86元，現價（0.221元）折讓74%，就算唔重秤泛海嘅資產物業，泛海折讓同其他已重估嘅地產股睇齊，折讓縮至40%到50%，泛海起碼升1.3倍到0.51元。
渝港母憑子貴
渝港（613）旗下確利達（1224）變身祖國房地產股，母憑子貴，渝港NAV增值高達10億銀，等於渝港每股NAV增值0.12元，幾乎同渝港現價0.125元睇齊。連埋呢筆增值計，渝港NAV上到0.36元，現價相對折讓65%，可以炒折讓。
又渝港去年6月底，手頭揸住淨現金2.7億銀，係現金牛企業，財政靚絕，防風力有番咁上下。吼實0.12元左右水位撈底，短打博15%回報，渝港見0.138元，未有耐到NAV水位。