幾時都話喺屋企最舒服，坐喺梳化，對住部電視嘅同時，亦可用電腦寫稿，最啱我呢種電視汁撈飯嘅人。
大學時住宿舍，一層樓七、八十個宿友要睇電視都係去交誼室（CommonRoom），雖然有有線睇，但咁多人共用，想睇心水嘅台，就睇你爭唔爭到喇！
由娛樂台轉到足球台
每逢足球大賽，交誼室一定迫爆，仲係陽盛陰衰！我當時只係覺得呢班男同學好霸道，攪到我同其他女仔冇得睇追開嘅連續劇。心諗如果響佢哋睇緊大戰時，一手㩒去娛樂台會有咩後果？會唔會畀班男人打？當然只係敢想唔敢做啦！佢哋班人一有射門同有波入就叫到拆天咁，惟有返房算喇！
到Year3我加入球彩台後開始睇波，足球台就係「日用的食糧」，逢親大戰，我梗約埋志同道合嘅男同學一齊睇，一齊嗌！我連角色都轉埋，成為以前自己成日暗罵嘅波友。無計啦，「同學愛新鮮，睇波大過天」，偶爾見到有女同學入嚟以苦苦哀求嘅眼神想轉台，就大聲嚇走佢哋。其實學校可以設立睇波專區，咁就唔會畀人霸住部電視啦！
WENDY
由歐國盃EuroBabes，變身球彩台受歡迎主持。