散戶最驚梗係「坐艇」，都唔知個價幾時先至返「家鄉」，呢種「望鄉」心情都幾難受。網友Alexero屋企人好好彩，苦候咗足足6年嘅「長江一號」終於見家鄉，佢係《香港討論區》好興奮留言，「屋企人6年前誤上賊船，大嗱嗱十萬蚊，係102.5元個價買咗一手長實（001），從此一去不回，派息又唔高，仲差過擺喺銀行；等咗6年，終於返家鄉，上個禮拜五收100.8元，真係有啲激動，屋企人係22號以109.3個價跳車走咗。」
97年坐艇多未見岸
雖然要坐艇咁耐，但Alexero就從中學到個好寶貴嘅教訓──大家唔好口輕輕話「長線投資」，買貴貨絕對可以有排坐！「屋企人喺10年前、即97年，喺24蚊買咗一手希慎興業（014），最近爆升咁多都係得21個幾，問你死未！想當年希慎都係藍籌嚟㖭！不過，屋企人唔肯止蝕，都要負相當大嘅責任。」
網友睇到Alexero嘅留言都好戥佢高興；Kenchu86就話：「恭喜你逃出賊船。」Basicplus就有啲酸溜溜，「你就好啦！我阿爸苦候咗7年嘅新世界（017）仲未見到家鄉呀！當年21蚊買，家吓都係17個幾。」
獨沽求敗就最憎啲九流分析員成日話「有買貴、冇買錯」，成日叫人追國壽（2628）。Kolau講：「經一事、長一智！以後醒啲喇！李家嗰啲貨，打死我都唔買，就算賺硬都係咁話，寧願唔賺。」
Anskar就話呢個經驗，好值得高追坐艇唔願放手嘅人借鏡，「長期投資當然好，但股價俾人炒到上天先至入貨，話係長線投資，就太可笑！坐艇嘅股可能要等好多年先有望見家鄉，應該嚴守止蝕。」Dongdongs就覺得長揸同止蝕各有各好，「如果止蝕嘅策略放喺滙豐（005），就唔係咁掂，但如果長揸8號仔電盈就死梗，所以揸唔同股要有唔同嘅買賣策略，要自己做分析，睇吓長遠有冇景，唔好求祈聽人話乜就買乜！」
其實仲有幾隻藍籌嘅股價仲未見家鄉，好似聯通（762）同和黃（013），2000年嘅股價分別高見21.45元及136.36元，上周五報10.78元同78.95元，有排都未到岸；而恒地（012）99年曾見52.75元，上周五報則收45元，都有段距離。