股票投資唔同細路仔玩泥沙，要「先求知，後投資」，揀優質股事前可能要花唔少工夫做好資料蒐集，作為股場新丁，究竟應該從何入手？
《MSN》討論區中，投資初哥Hassan1111問：「對於毫無股票投資經驗嘅人嚟講，如果要入市，點樣先可以搵到適合嘅股票投資？要了解一間公司係咪值得押注，應該留意啲咩？我大約有2500蚊美金可以用嚟投資，好似我呢啲小投資者，係咪最好喺網上進行股票買賣，慳番啲經紀佣金？」
網友JoanArc建議：「如果想投資股市但又冇乜經驗，買交易所買賣基金（ExchangeTradedFunds，簡稱ETF，是一種追蹤相關指數變化，且在證券交易所上市交易之基金）會比較穩陣。」
至於網上經紀邊間好？佢就推介TDAmeritrade，因為除咗每筆交易費較平外，呢間公司嘅研究部仲會向標準普爾提供股票報告！佢仲話：「如果想成為股票專家，可以試吓每日記錄50大企業嘅股價表現，了解佢哋股價上漲嘅動力。起初，你可能會覺得蒐集呢啲數據冇乜用，但日子有功，慢慢你就會學識分析股價上落嘅原因同走勢，同埋點樣搵出有潛力嘅優質股。」
由50大開始做功課
investmentnewbie就問：「我想買股票，但對股市術語一竅不通，就算睇報紙報道有關股市嘅新聞，有時都睇唔明，唔知有冇方法解救呢？」
JoanArc認為門外漢可以上網登入www.fool.com，佢話呢個網站除咗會為投資者提供多項建議外，仲有教人投資嘅基本功，同分析各類股票嘅文章。
DYNYSIUK1就話：「對投資美股有興趣嘅新手，不妨登入www.investopedia.com，網站有大量投資入門嘅資料，都相當有用。」