唔使搵睇相佬都知，呢排亞洲首富李嘉誠當黑，啲負面新聞鑊鑊新鮮鑊鑊甘，幾乎可以改名做負面超人。衰開有條路，入伙冇耐嘅將軍澳都會駅，除咗蝕讓不斷之外，亦俾班業主勁踩。雖然質素得人驚，但（可能）身為業主之一嘅wongtaiman怕唱衰個盤，樓價再跌多幾跌就渣都無得剩，所以落力喺屋苑新成立嘅業主討論區《相聚@都會》起題，列舉樓盤十大優點：
1.特別多全身鏡，走廊、浴室、廚房都有，可見長實捨得花錢買料；
2.露台、主人房玻璃又大又多，窗嘅開關經特別設計，有防噪音功能；
3.用地磚唔用木板，容易清潔；
4.大堂夠豪氣，部𨋢夠舒適；
5.會所規模全港排十名內；
6.貼心小設計多，浴室送浴簾；
7.收樓有非常專業的一張收樓執漏清單；
8.地鐵大堂日夜有幾位黑衫猛男開門，黃色救生制服地鐵保安平台恭候，執漏時有超過10位師傅同時幫你執間屋，直至你滿意為止；
9.地址名正，8KingLingRoadMetroTown；
10.名師設計。
最後仲有個總結，「長實樓盤經常能夠跟上時代潮流，設計方面有名師指點，尤其園林設計、兒童公園。長實捨得花錢在大的方面，講門面氣派。」
逐點擊破都會駅優點
呢篇文章喺佢哋個業主網度，回應唔算太多，反而俾Anti_block轉貼咗去《香港討論區》，幾日間已經有近50人回應，評語係點？大家都一定預計得到。最抵死係Anti_block仲叫大家投票，睇吓同唔同意喎，結果29個人入面，有26個唔同意；兩個冇意見；同意嘅得一千零一個。
回應得最用心嘅首推maytom69，佢逐點擊破，話鏡平過雲石、部𨋢大啲可以豁免樓面……仲話所有長實樓盤，牆身一定有工人寫上「有汗出，無糧出」（事緣都會駅地盤曾出現工人示威，投訴拖欠薪金，更曾高舉「有汗出，無糧出」橫額）。
Anti_block話：「上咗賊車，俾人打劫完，仲要同班賊同車再打劫下一班乘客，香港業主真係好奇怪？」