郭富城海軍型帽
「呢頂帽係佢哋特別為我造嘅，自從拍戲剃光頭之後，佢哋覺得我個feel似海軍，所以就有呢個concept整頂帽畀我。我覺得都幾適合我，而且帽真係可以成為潮流服飾嘅一種。但戴帽好講究臉形，我對呢方面都好有研究。𠵱家啲頭髮未長，相信我都有一排會戴唔同款式嘅帽。」
衞詩斯文手帶
「我條Moussy皮手帶喺日本買，覺得好靚同好特別，而且可以襯斯文啲嘅衫。至於Rocawear贊助我嘅耳環同手鈪我都好鍾意，好適合我嘅style，呢個牌子真係好好，成日贊助我飾物，而且仲任我攞，所以都慳番唔少買飾物嘅費用，仲可以益埋家姐㖭。」
方大同滑水黑金
「呢隻錶喺專用嚟滑水時戴嘅，而且香港冇呢個牌子嘅錶，上次我去夏威夷見到就買咗。因為我本身好鍾意金色嘢，但係我又好怕hiphop嗰啲好浮誇嘅金色，而黑色撞金色我覺得好好睇。」
李亞男貓形耳環
「平時見到好多得意耳環都忍唔住買，好似呢條貓形耳環咁，有時又會自己整，因為DIY嘅耳環係獨一無二，同埋可以隨意配搭，不過最主要係平，喺街買最少都要百幾蚊，自己去深水埗買珠仔好平，所以自己整真係又平又靚。」
採訪、攝影：駱華齡、王連連、李珮洳
